Taro ar draws Mrs Thatcher yng Nghanol Caerdydd 
 
Fues i'n rhythu'n rhy hir arni,
y farwnes nawr, y gwir anrhydeddus.
 
Odd hi fynna, yng nghanol 
canol Caerdydd yn byta 
llygod ffyrnig gyda photel o Châteauneuf-du-Pape
a sos brown.
 
O'n i'n rhythu, a mae'n rhaid bod hi
'di sylwi pell cyn troi
'chos nath hi ddechre neud
y stumie rhyfedda o fyta un o'r creaduried;
wpo'i berfedd biws e mewn i'w cheg,
a gadael i'r sudd lifo lawr ei gen,
(fel 'se ti'n disgwyl gan dôri s'bo)
ac odd hi wir yn joio, cymryd ei hamser fyd,
mynd â thracht o win
a choluddyn am yn ail
tra bo'r llygoden druan dal i wichian.
 
A falle dylwn i 'di mynd yr adeg yna
wrth glywed y gwichian yn codi o wddf yr anifail,
ond odd rhywbeth am y peth,
rhywbeth nath fy hudo,
a methes i fynd,
dim ond sefyll a syllu ar ysbryd Margret Thatcher
yn byta llygod ffyrnig
yng nghanol Canol Caerdydd.

Dyfan Lewis